Дөңгелек үстелге қатысушылар арасында бірқатар бірегей және болашағы зор бастамалар болды: Alaqan, Arlan biotech, Cerebra, Higgsfield, Citix, Aardvark, SpaceLab, Grand mobile, Indrive, O’games, Flowsell және Omnium.

«Бұл жобалар тек техникалық дарындылықты ғана емес, сонымен қатар нақты мәселелерді шешуге деген ұмтылысты көрсетеді. Біз олардың жетістіктерін, сын-қатерлерді және одан әрі даму әлеуетін талқыладық. Біздің министрлік осындай озық идеяларды қолдауды мақтан тұтады және оларды іске асыруға белсенді жәрдемдеседі. Біз қазақстандық өнімдер экспортын ұлғайтуға және мықты IT-қауымдастық құруға ұмтыламыз. Мұндай жобаларды дамыту – осы бағыттағы маңызды қадам. Инновациялық компаниялармен ынтымақтастық орнату арқасында біз азаматтарымыздың өмірін жақсарту және қолайлы технологиялық экожүйе құру үшін көп нәрсе жасай аламыз», – деді Бағдат Мусин.

Кездесуге қатысушылар өз жобалары мен жетістіктерін таныстырып, жұмыстарының нәтижелерін талқылады. Сын-қатерлер мен қиындықтарды еңсеру бойынша тәжірибелерін ортаға салды. Тәжірибе алмасу алаңы қатысушыларға әр жобаның даму жолын жақсырақ түсінуге, инновациялық сала  қарқыны мен қажеттіліктерін анықтауға үлес қосты.

ЦДИАӨ министрлігі мен Astana Hub аймақтарда инновация мен технологиялық кәсіпкерлікті дамытуға үлес қосу мақсатында мұндай кездесулерді тұрақты ұйымдастырады. Бұл іс-шаралар Үкімет пен IT-қауымдастық өкілдері арасындағы диалогты қолдап, саланы дамытудың өзекті мәселелерін талқылауға септігін тигізеді. Сонымен қатар инновациялық дамуды ынталандыру мен экожүйені жақсарту үшін әлеуетті шешімдерді анықтауға мүмкіндік береді.

Бүгінде Орталық Азиядағы ең ірі технопарк саналатын Astana Hub-та 1 455 IT-компания тіркелген, оның ішінде 403-і шетелдіктердің қатысуымен. Технопарк қызметі ІТ-бизнес үшін экожүйені құруға және дамытуға, ІТ мамандарын дайындап, стартап жобаларды қолдауға бағытталған.