Орталықтың идеясы — таланттар, технологиялар мен жобалар шоғырланатын ЖИ саласындағы жетекші сараптамалық хаб құру. Ол Астанадағы Nur Alem сферасының бүкіл аумағын қамтиды және әлемдік деңгейдегі бірегей алаңға айналмақ.

  1-қабат — ашық қоғамдық кеңістік. Мұнда түрлі іс-шаралар мен хакатондар өтеді. Сонымен қатар AI-музей, AI-кинотеатр, AI-кафе, AI-экспозиция, балаларға арналған AI-аймақ бар.

 2-3-қабаттар – TUMO Education бағдарламасына арналған. Мұнда жыл сайын 5–6 мың жасөспірім IT-дің 11 бағыты бойынша оқытылады: генеративті ИИ, геймдев, анимация, 3D-модельдеу, робототехника, графикалық дизайн және т.б.

 4-5-қабаттар — Tomorrow School. Бұл 18 жастан жоғары жастарға арналған peer-to-peer оқытуға негізделген жасанды интеллект мектебі. Жылына шамамен 1000 адам 18–24 айлық офлайн бағдарламада білім алады.

 6-қабат – AI Campus. Мұнда жасанды интеллект бойынша стартаптар дамиды. Astana Hub-та тіркелген 1500-ден астам стартаптың шамамен 10%-ы ЖИ саласында жұмыс істейді. Оларға арналған AI’preneurs атты арнайы акселерациялық бағдарлама бар. Қатысушыларға есептеу ресурстары, дайын деректер жиынтығы (dataset), LLM модельдері, менторлар мен тренингтер ұсынылады.

7-қабат — Big Tech R&D-зертханалар мен халықаралық серіктестер кеңістігі. Бұл алаңда ірі компаниялар студенттерге тапсырмалар беріп, стартаптармен ынтымақтаса алады немесе оларды сатып ала алады.

8-қабат — AI-driven Government. Бұл – мемлекет, бизнес пен ғылым арасындағы ЖИ негізінде ынтымақтастық алаңы. Мұнда ЖИ шешімдерін мемлекеттік басқару мен түрлі салаларға енгізу жолдары пысықталады.

Жаслан Мәдиевтің айтуынша, alem.ai — Astana Hub табысты тәжірибесінің жалғасы. 
Alem.ai дәл осы үлгімен дамып, болашақта шетелде де өз филиалдарын ашуы мүмкін.

“Alem.ai – бұл әлемде теңдесі жоқ жоба. Ертең шетелдік делегациялар, мемлекет басшылары мен халықаралық компаниялар Қазақстанға келіп, дәл осы жерде алғашқы халықаралық жасанды интеллект орталығының құрылғанын көретін болады. Бұл — Қазақстанның ЖИ саласындағы жаһандық амбициясының жарқын көрінісі,” – деді министр.

Толығырақ Digital Business сайтынан оқи аласыздар