Astana Hub резиденттері финтех саласының дамуына зор үлес қосып жатыр

Елімізде финтех-стартаптардың саны соңғы бес жылда 4 есеге артты: 2018 жылы 50-ден астам жоба болса, 2023 жылы 200-ден асты. Бұл туралы Rise Research компаниясының Mastercard, Қазақстанның Ұлттық төлем корпорациясы және Tarlan Payments-пен бірлесіп жүргізген Қазақстандағы финтех-секторының дамуы туралы зерттеу мәліметтері айшықтайды. Сондай-ақ финтех елімізде тартылған венчурлық капитал көлемі бойынша көш бастап тұр: 2023 жылы осы саладағы стартаптарға 32 миллион доллар инвестиция тартылды. Орталық Азия елдеріндегі финтех-экожүйесі қалай дамуда? Оның қарқын алуына банктер мен реттеуші органдар қандай үлес қосып жатыр? Осы және басқа да сұрақтар Алматыда өткен Central Asia Fintech Summit панельдік сессиясында талқыланды.