Жиын барысында ақпан айында Парижде өткен Жасанды интеллект бойынша саммитінің негізгі қорытындылары талқыланып, Қазақстан мен Франция арасындағы болашақ ынтымақтастық бағыттары айқындалды. Саммитке әлемнің 100-ден астам елінен 1000-нан астам делегат қатысты. Бұл — жасанды интеллектіні этикалық, инклюзивті және тұрақты дамытуға бағытталған бірлескен әрекеттерге жаһандық қызығушылықтың жоғары екенін көрсетті.

«Біз елімізде жасанды интеллектінің дамуына арналған мықты экожүйе құруға белсенді кірістік. Басты бастамалардың бірі — халықаралық alem.ai жасанды интеллект орталығын құру. Бұл орталық зерттеулерге қолдау көрсетіп, стартаптардың өсуіне ықпал етіп, түрлі елдерден сарапшыларды біріктіретін алаң болмақ. Басты мақсатымыз — жыл сайын 200 000 азаматқа, оның ішінде студенттерге, мамандар мен мемлекеттік қызметшілерге жасанды интеллект бойынша білім беріп, олардың біліктілігін арттыру. Біз жасанды интеллектінің баршаға қолжетімді болғанын көздейміз», – деді ҚР Цифрлық даму, инновациялар және аэроғарыш өнеркәсібі бірінші вице-министрі Қаныш Төлеушин.

Қазақстан мен Франция жасанды интеллект саласындағы бірлескен даму үшін мол мүмкіндіктер бар екенін атап өтті. Екі тарап та осы бағыттағы ынтымақтастықты тереңдетуге арналған бастамаларын таныстырды.

«Франция бүгінде жасанды интеллект бойынша Еуропадағы жетекші елдердің бірі. Бұған мемлекет қолдауы, стартаптар белсенділігі және ғылыми орталықтардың дамуы себеп болып отыр. Париж саммиті жасанды интеллектіні этикалық әрі тұрақты дамытуға бағытталған жаһандық тәсілді қалыптастыратын маңызды алаңға айналды. Қазақстанның бұл саммитке қатысып, осы процесте белсенді рөл атқаруға дайын екенін көрсетуі – құптарлық қадам. Алдағы уақытта Франция мен Қазақстан арасындағы стратегиялық ынтымақтастықты жаңа деңгейге көтеретін нақты қадамдар жасалады», – деді Францияның Қазақстандағы Елшісі Сильван Гиоге.

Талқылауға Astana Hub басқарушы директоры Танат Өскембаев, Alstom компаниясының Орталық Азиядағы директоры Жером Бойе және HubLab.ai стартабының директоры Иван Кононов қатысты.

Спикерлер жасанды интеллект саласында халықаралық ынтымақтастықтың маңыздылығын атап өтіп, білім мен тәжірибе алмасуға, ғылыми зерттеулерге және ЖИ-инфрақұрылымды дамытуға бағытталған жобаларды жүзеге асыруға дайын екендерін білдірді. Сонымен қатар Astana Hub секілді технологиялық хабтардың бірлескен бастамаларға арналған тиімді алаң екені ерекше аталды.