Конкурс еліміздің инновациялық және болашағы зор стартаптарын анықтап, оларға қолдау көрсетуге бағытталған. Сондай-ақ үздіктер халықаралық деңгейде танылу мүмкіндігіне ие болады. 

Конкурсқа Product Market Fit (PMF) кезеңінде тұрған, яғни өз өнімдерінің сұранысын дәлелдеп, нарықта орнын тапқан стартаптар қатыса алады. Сондай-ақ масштабтау кезеңіндегі (Scale) стартаптар мен халықаралық нарыққа шығуға ұмтылатын жобалар да бақ сынай алады.

Конкурс бірнеше кезеңнен тұрады:

• Өтінім қабылдау: 16-25 қыркүйек аралығында конкурсқа қатысқысы келетін стартаптар сайтта тіркеліп немесе мына сілтеме арқылы өтінім формасын толтыруы тиіс.
• Өтінімдерді бағалау: 26-28 қыркүйек аралығында кәсіби қазылар алқасы барлық өтінімді саралап, келесі кезеңге өтетін үздік жобаларды іріктейді.
• Жобалардың оффлайн-презентациясы: 30 қыркүйекте іріктеуден өткен қатысушылар өз жобаларын таныстырады.
• Финал: конкурстың ақтық мәресі де 30 қыркүйекте өтеді. Салтанатты рәсім барысында Филип Котлердің кітабына енетін жеңімпаздар анықталады.

Айта кетейік, конкурсты EOMM KAZAKHSTAN Astana Hub халықаралық технопаркі және QM Meta медиа агенттігімен әріптестікте өткізіп жатыр. Стартаптарға арналған байқау туралы қосымша ақпарат алу және өтініш беру үшін мына сілтемеге өтіңіз.

Профессор Филип Котлер туралы

Филип Котлер — халықаралық маркетинг саласындағы әлемге әйгілі профессор, маркетинг саласындағы іргелі 80-нен астам кітаптың авторы. Маркетинг «әкесі» ретінде танылған Котлер қазіргі маркетингтік ойлауды қалыптастырған көптеген концепция мен теория авторы. Ол «маркетинг» терминін академиялық және іскерлік айналымға енгізіп, негізгі қағидаттары мен стратегияларын жасады. Оның кітаптары әлемнің 58 елінде 20 тілде 3 миллионнан астам данамен басылып шыққан.