Freedom Data Challenge 2025 хакатонының басты сәттерінің бірі – бүкіл елден келген студенттерді, жас мамандар мен болашағынан үміт күттіретін аналитиктерді біріктірген жобаның аясында SDU University студенттерінің командасы клиенттік деректерді өңдеуде сапалы әрі тәжірибеге бағытталған тәсілмен жүлделі орынға ие болуы болды.

Аталған іс-шараның тең ұйымдастырушысы ретінде Data Science Academy IT-мектебі қатысып, жеңімпаз команданың бір мүшесін дайындауда маңызды рөл атқарды. Ол Tech Orda 2025 бағдарламасы аясында «Data Science және Машиналық оқыту» бағыты бойынша академияда оқуды сәтті аяқтады. Мұхтардың жетістігі – осы бағдарламаның қолданбалы құндылығын және заманауи еңбек нарығы талаптарына сәйкестігін дәлелдейді. Бұл бағдарламада деректерді талдау, модель жасау және командамен жұмыс істеу сияқты дағдыларға басымдық беріледі.

— Хакатонда жүлделі орын алғандарыңызбен құттықтаймыз! Өзіңіз және командаңыз туралы айтып беріңізші.

Рақмет! Менің атым – Мұхтар. SDU University-де «Ақпараттық жүйелер» мамандығы бойынша 4-курс студентімін. Германиядағы Hof University of Applied Sciences университетінде Computer Science факультетінде академиялық ұтқырлық бағдарламасы бойынша білім алдым. Жақында Tech Orda бағдарламасы аясында Data Science Academy-де «Data Science және машиналық оқыту» бағыты бойынша білім алып, үшінші легтің үздік ондығына ендім.

Алған білім мен тәжірибе хакатонға қатысу үшін жақсы негіз болды, әсіресе мықты командаластармен жұмыс істеу ерекше тәжірибе болды. Біз төртеу болдық: екі студент – кіші курс, екеуі – жоғары курс. Барлығымызда нақты тәжірибе болды – біреу индустрияда жұмыс істейді, енді біреу университетте ғылыми жобалармен айналысады. Бұл бізге тапсырмаларды тиімді бөлуге және бастан-ақ нақты жұмыс жүйесін құруға мүмкіндік берді.

— Қандай тапсырма орындадыңыздар және сіздердің шешімдеріңіздің ерекшелігі неде?

Тапсырманы өзіміз таңдамай, бізге Freedom Broker компаниясының кейсі берілді. Негізгі мақсат – клиенттерге RFM-талдау жүргізіп, оларды белсенділігі мен компанияға әкелетін құндылығы бойынша сегменттеу. Біз тапсырмаға стандарттан тыс көзқараспен қарадық, метрикаларды есептеудің креативті әдісін ойлап таптық, нәтижесінде логикалық және сапалы кластерлер алдық. Қазылар алқасы шешімнің нақтылығын және практикалық қолдану мүмкіндігін ерекше атап өтті. Сонымен қатар, біз метрикаларды визуализациялайтын және табысты клиент сегменттерін анықтауға көмектесетін аналитикалық веб-платформа жасадық.

— Қандай технологияларды қолдандыңыздар?

Деректерді талдау үшін Python және оның машиналық оқыту мен статистикаға арналған кітапханаларын қолдандық. Веб-интерфейс React, Vite және Tailwind CSS арқылы жасалды. Бэкэнд Flask API негізінде, Redis пен PostgreSQL мәліметтер базасымен жұмыс істеді.

— Жоба барысында қандай қиындықтар болды?

Ең үлкен қиындық – RFM-талдаудың нақты әдістемесін құру. Біз параметрлер арасындағы байланысты талдап, логиканы ұзақ талқыладық, тақтада модель құрылымын салып, көп уақыт жұмсадық. Бірақ нәтиже соған тұрарлық болды.

— Data Science Academy-дегі оқу хакатондағы табысқа қалай әсер етті?

Айтарлықтай әсер етті. Академия бағдарламасы практикалық бағытқа негізделген, сондықтан біз тек теорияны ғана емес, оны нақты жағдайда қалай қолдану керектігін де білдік. Бұл бізге сенімділік пен икемділік берді.

— Tech Orda бағдарламасы сіздің дамуыңызға қалай әсер етті?

Tech Orda – Қазақстан жастары үшін үлкен мүмкіндік. Қысқа уақыт ішінде мен нақты іске қажет білім алдым. DSA-дағы оқу мен бағдарламаның қолдауы арқасында мен Data Miner болып жұмысқа орналастым – бұл менің даму жолымдағы маңызды кезең болды.

— Бұл жобаны әрі қарай дамытуды жоспарлап отырсыз ба?

Қазіргі уақытта – жоқ. Бұл нақты тапсырмаға арналған жоба болды. Алайда жобаны әзірлеу кезінде жинаған тәжірибе алдағы бастамаларда міндетті түрде пайдасын тигізеді.

— Хакатоннан алған әсеріңіз қандай?

Ұйымдастыру деңгейі өте жоғары болды – бәрі нақты әрі жайлы өтті. Тек, қазылар алқасы техникалық емес, бизнес-бағыттағы шешімдерді де бағалайтыны туралы ақпаратты алдын ала айту керек еді. Бұл командаларға басымдықтарды дұрыс қоюға көмектесер еді.

— Хакатоннан алған басты сабағыңыз қандай?

Жеңісті хакатон үшін – нақты рөлдер мен міндеттерді бөлу маңызды. Әр қатысушы өз ісіне жауапты болғанда ғана мықты, толыққанды нәтиже алуға болады.

— Хакатонға қатысуға күмәнданатын әзірлеушілерге не айтар едіңіз?

Қорықпаңыздар. Тақырып сізге беймәлім болса да, хакатонның атмосферасы ашылуға көмектеседі. 10 сағат ішінде сіз тек тапсырманы орындап қана қоймай, өз-өзіңізге деген сенімді нығайта аласыз. Бұл – дағдыларыңызды тексерудің және тез дамудың тамаша жолы.

— Сұхбат үшін рақмет! Жобаларыңызда табыс тілейміз!

Сіздерге де рақмет! Тәжірибемізбен бөліскенімізге қуаныштымын.

#Tech Orda 2024 #Astana Hub #Data Science Academy