Бұл шара әйел кәсіпкерлер үшін инновациялық жобаларын венчурлық қор Big Sky Capital VC-ге ұсынуға және аймақтың жетекші инвесторларымен танысуға мүмкіндік берген серпінді алаңға айналды. Big Sky Capital VC венчурлық қоры инклюзивті қаржыландыруды және технология саласындағы әйелдерге қолдау көрсетуге бағытталған мақсатымен танымал.

Invest Day-дың басты мақсаты – әйелдер негізін қалаған, әсіресе бастапқы кезеңдегі технологиялық стартаптарға инвестициялық мүмкіндіктер ұсыну. Бұл стартаптар инвесторлармен байланыс орнатып, аймақтағы инновациялық жобаларды дамытуға мүмкіндік алды. Шараға қатысу үшін бір апта ішінде 46 өтінім түсті, оның ішінде Big Sky Capital үшін маңызды критерийлерге сәйкес 16 стартап таңдалды. Олар MVP (минималды өміршең өнім), тексерілген бизнес-модель (негізінен B2B) және мықты команда талаптарына сай келді. Қатысушы стартаптар түрлі салаларда инновациялық шешімдер ұсынды: киберқауіпсіздік, FemTech, финтех, ойын индустриясы, HealthTech, индустриалды технологиялар, GreenTech және HRTech.

Шараның басты назарында Big Sky Capital VC болғанымен, оған басқа да танымал венчурлық қорлар да қызығушылық танытты. Қатысушыларға маңызды кеңестер мен ұсынымдар берген инвесторлар қатарында Big Sky Capital венчурлық қорының тең құрылтайшысы Әділ Нұрғожин, қордың венчурлық серіктесі Дженни Джениш Кызы (Ensi T.), MOST Ventures қорынан Іңкәр Оспанова, Sturgeon Capital қорынан Назерке Қалидолда және Accelerate Prosperity, ADVentures қорынан Даниэль Абдылдаев болды. Бұл бірлескен күш-жігер әйел кәсіпкерлерді қолдауға және Орталық Азиядағы инновацияларды дамытуға бағытталған жалпы міндеттемені айқындайды.

Көптеген қатысушы стартаптар венчурлық қорлар мен инвесторлардың назарын аударып, ықтимал инвестициялар күтуде.

2023 жылы құрылғаннан бері Big Sky Capital VC $20 млн АҚШ долларын тартты және қорды кеңейту жұмыстарын жалғастыруда. Қордың портфелінде 30-дан астам стартап бар, оның үшеуін әйелдер басқарып отыр, бұл венчурлық индустриядағы гендерлік теңсіздікті көрсетеді — әлем бойынша әйелдер негізін қалаған стартаптар жалпы венчурлық қаржыландырудың тек 2%-ын алады. 2024 жылы Дженни Джениш Кызы Big Sky Capital қорына венчурлық серіктес ретінде қосылып, әйелдер негізін қалаған стартаптарға венчурлық капиталға қолжетімділікті жылдамдату мақсатында жұмыс істей бастады. Орталық Азиядағы әлеуметтік кәсіпкерлік саласындағы тәжірибесі және БҰҰ-мен STEM бастамалары бойынша жұмысы Дженнидің осы өңірде Women Founders қауымдастығын құрудағы маңызды рөлін айқындайды.

Big Sky Capital алдағы уақытта тұрақты даму мен гендерлік теңдікті басты басымдықтардың бірі ретінде қарастырады. Бұл стратегиялық бағыт қордың түрлілікке және венчурлық экожүйеде мағыналы мүмкіндіктер жасауға деген ұмтылысын көрсетеді.

«Орталық Азиядан келген стартаптардың сапасы мен әртүрлілігіне таңғаламыз», — деді Big Sky Capital қорының тең құрылтайшысы Әділ Нұрғожин. «Бұл шара аймақтағы әйел-кәсіпкерлердің ерекше әлеуетін көрсетіп, венчурлық қаржыландырудағы гендерлік алшақтықты қысқартуға деген біздің ұмтылысымызды нығайтады».

Дженни Джениш Кызы шараның маңыздылығын атап өтті: «Әйелдер негізін қалаған стартаптарға венчурлық қаржыландырудың 2%-дан төмен мөлшері ғана бөлінеді деген мифті жоюдың уақыты келді. Біз бұл мәселенің қоғамдық мәселе екенін және оған жүйелі түрде қарау қажет екенін түсінеміз. Венчурлық серіктестер, академиялық институттар мен IT-хабтардың біздің миссиямызға қосылып жатқанын көру мені қуантады. Бүгінгі шара — біздің бірлескен күш-жігеріміздің дәлелі, 2025 жылғы үлкен мүмкіндіктерді асыға күтеміз».

Astana Hub шараны ұйымдастырушы ретінде Орталық Азиядағы инклюзивті және алуан түрлі стартап экожүйесін құруды мақсат етеді. Invest Day қатысушыларға өз жобаларын таныстыру мен желілік байланыстар орнатуға маңызды мүмкіндіктер ұсынды, бұл салаларды өзгертіп, әлеуметтік оң әсер қалдыруы мүмкін.

«Орталық Азиядағы әйелдер кәсіпкерлігінің болашағына үлкен үмітпен қараймыз және осы стартаптардың көпшілігі табысқа жетіп, қаржыландыру тартады деп үміттенеміз», — деді Astana Hub халықаралық ынтымақтастық және инвестициялар офисінің бас менеджері Алмагүл Тапаева. «Бұл тек бастамасы және біз әйелдер басқаратын бастамаларды қолдауға ниеттіміз».

Big Sky Capital өзінің гендерлік теңдікке деген міндеттемесін нығайту үшін Орталық Азиядағы Women Founders and Investors қауымдастығын құрып отыр. Бұл Telegram платформасы венчурлық индустриядан жаңа білім ұсынып, әйел-кәсіпкерлер арасында идеялармен алмасуды, сондай-ақ ынтымақтастықты дамытуға көмектеседі. 2025 жылы аймақтың жетекші IT хабтарымен серіктесе отырып, бұл бастама жаңа іс-шаралар мен қауымдастықты қолдауға бағытталады.

Бұл бірлескен күш-жігер Орталық Азиядағы әйел-кәсіпкерлерднің технологиялық экосистемадағы рөлін күшейтіп, олардың әсерін арттыру үшін алаңдар құрудың маңыздылығын көрсетеді. Invest Day сияқты шаралар әйелдер басқаратын стартаптар мен венчурлық капитал арасындағы алшақтықты қысқартуға, инклюзивті инновацияларды алға жылжытуға және аймақтың келесі ұрпақ кәсіпкерлік көшбасшыларының позицияларын нығайтуға маңызды рөл атқарады.

Astana Hub туралы
Орталық Азияның ең ірі инновациялық орталығына айналған Astana Hub технопаркінің қызметі ІТ-бизнес үшін экожүйені құруға және дамытуға, ІТ-мамандарын дайындап, стартап-жобаларды қолдауға бағытталған.  Бүгінгі таңда технопаркте 1500-тен астам IT-компания тіркелген, оның ішінде 400-ден астамы шетелдіктердің қатысуымен. Оларға бизнесті дамыту және масштабтау бағдарламалары, арнайы салықтық және визалық, ақпараттық-білім беру, материалдық инфрақұрылым және тағы басқа қолдау көрсетіледі. 

Big Sky Capital VC туралы
Big Sky Capital — дамушы елдерден шыққан кәсіпкерлерге қолдау көрсетуге бағытталған ерте кезеңдегі венчурлық қор. Майами, Қазақстан және Сингапурда офистері бар қор 30-дан астам стартапты қамтитын портфельді басқарады. 2023 жылы тартылған $20 млн қаражат әйелдер мен иммигранттар негізін қалаған бизнеске, әсіресе технологиялар саласындағы жобаларға қолдау көрсетуге жұмсалды.

IT Park Uzbekistan туралы
IT Park Uzbekistan — Өзбекстанда IT және технологиялық стартаптардың экожүйесін дамытуға бағытталған мемлекеттік бастама. Парк кәсіпкерлерге өз технологиялық идеяларын масштабтауға арналған қолдау мен ресурстар ұсынады.

Қырғыз Республикасының Жоғары технологиялар паркі туралы
Қырғыз Республикасының Жоғары технологиялар паркі — Қырғызстанда инновация мен кәсіпкерлікті қолдауға арналған бастама. Ол технологиялық стартаптар мен жаңа бизнестерге ресурстар мен көмек көрсетеді.