Қазақстандық оқушылар 45 алтын, 72 күміс және 98 қола медаль жеңіп алып, жоғары нәтиже көрсетті.

Байқау ағылшын тілінде: робототехника (FLL Challenge және Arduino Hackathon), компьютерлік бағдарламалау, компьютерлік графика және өнер, қолданбалы ғылыми жобалар, қысқаметражды фильмдер және қолданбалы математика жобалары секілді алты бағыт бойынша өтті.

 Байқаудың мақсаты – ақпараттық технологиялар саласындағы ғылыми зерттеулерге қызығушылық танытатын дарынды жастарды анықтау, қолдау және дамыту. Сонымен қатар, дарынды оқушылардың ғылыми-зерттеу жұмыстары негізінде жаңа жобалар жасау, олардың шығармашылығын ақпараттық технологиялар саласын дамытудың тиімді құралы ретінде пайдалану, сондай-ақ халықаралық ынтымақтастықты нығайту және түрлі ел  өкілдерінің қатысуымен шығармашылық тәжірибе алмасу - негізгі міндеттердің бірі.

  Айта кету керек, бұл байқау Қазақстанда 10 жылдан астам уақыт бойы өткізіліп келеді және осы уақыт аралығында ғылыми шараға әлемнің 20 елінен 5000-ға жуық оқушы қатысты.

Байқау жеңімпаздарына еліміздің және әлемнің беделді университеттерінің гранттары табыс етілді. Қазіргі уақытта олар видеография, дизайн, бағдарламалау және т.б. сияқты әртүрлі салада табысты еңбек етіп жатыр.

Байқауды ұйымдастырушылар – ҚР Білім министрлігінің «Дарын» республикалық ғылыми-практикалық орталығы және «Білім-Инновация» халықаралық қоғамдық қоры. Astana Hub халықаралық технопаркі INFORMATICS-ASIA байқауына демеушілік етті. Сондай-ақ, Sergek Projects, Documentolog Global Limited және IT CEO Club қолдау көрсетті.