Әл-Маннай мырзамен кездесу барысында тараптар цифрлық саладағы ынтымақтастықты нығайту перспективаларын талқылады. 

Қазақстан GovTech саласындағы жетістіктерін таныстырып, 80-нен астам мемлекеттік деректер базасын интеграциялау, проактивті мемлекеттік қызметтерді енгізу және 4,6 миллион пайдаланушысы бар eGov mobile қосымшасы сияқты табысты жобаларын атап өтті. 

Тараптар жасанды интеллектті дамыту және оны экономиканың түрлі секторларында қолдану бойынша ортақ басымдықтарды айқындады. Қазақстан бұл салада тәжірибе алмасып, бірлескен жобаларды жүзеге асыруды ұсынды. 

Киберқауіптердің артуына байланысты тараптар деректерді және ұлттық инфрақұрылымды қорғау саласындағы ынтымақтастықтың маңыздылығын мойындады. Қазақстан Катардың киберқауіпсіздік жүйелерін құрудағы тәжірибесін зерттеуге қызығушылық білдірді. 

Министр Катарға Қазақстанның спутниктік топтамасын құру жобасына қатысуды ұсынды, бұл тараптарға ғылыми және қолданбалы мақсаттарда деректерді бірлесіп пайдалануға мүмкіндік береді. 

Жаслан Мәдиев катарлық серіктестерді Astana Hub жобаларына қатысуға, сондай-ақ Қазақстанның АҚШ, Сауд Арабиясы мен Сингапурда құрылған халықаралық IT-хабтарының мүмкіндіктерін технологиялық стартаптарды жаһандық нарықтарда қолдау үшін пайдалануға шақырды. 

Кездесу қорытындысы бойынша тараптар ынтымақтастықтың нақты бағыттарын пысықтау үшін жұмыс тобын құруға уағдаласты. 

Дереккөз: ҚР ЦДИАӨМ