Аймақтық ауқымды форумына жалпы 150-ден астам адам қатысты. Жоба мақсаты технология саласында жұмыс жасайтын нәзік жандар санын көбейтіп, олардың өз жеке кәсіптерін дамытуға жол ашу. Форум спикерлері AI пайдалану жолдарын, ғаламтор арқылы жұмыс істеп табыс табудың қыр сырын үйретті. 

«Біз әйелдердің санасын басқа бағытқа бұрғымыз келеді.Олардың интернетте және цифрлық салада ақша табуды үйренгенін қалаймыз. Сол үшін Ақтау қаласына мықты спикерлер шақырдық. Маңғыстауда IT саласын дамытқысы келетін озық ойлы жастар мен кәсіпкер әйелдер, цифрлы сауатты жандар көп және солардың саны өскенін қалаймыз», - деді Technowomen коммерциялық емес ұйымының басқарма төрағасы, "Цифрлық Трансформация" ҚҚ негізін қалаушы, Азиза Шужаева.

Қатысушылар Astana Hub экосистемасының құрылымы бойынша, қолжетімді және қажетті бағдарламалар мен курстар туралы ақпараттандырылды. Technowomen-мен бірлескен "IT-Aiel" жобасы әйелдерге қаржылық тұрақтылыққа қол жеткізуге көмектесу мақсатында цифрлық дағдылар мен фрилансерлерді тегін online оқыту мүмкіндігін беретіндігімен таныстырып, өткен жылдың финалисті Алия Оразымбетова бағдарлама өз жобасын дамытуға қалай көмектескенімен бөлісті. Сонымен қатар AI бойынша болашақ трендтер мен жұмыста қолдану негіздері ашып талқыланды.