Сегіз аптаға созылған акселерациялық бағдарлама барысында қатысушылар B2B SaaS, DeepTech және EdTech салаларында жұмыс істейтін стартаптар үшін арнайы әзірленген менторлық бағдарламадан, өнімді пысықтау, бизнес-модельді жетілдіру және ауқымдану стратегиялары бойынша қарқынды курстан өтті. Бағдарламаға әлемнің түкпір-түкпірінен 3500-ден астам өтінім түсіп, тек 11 елден 15 үздік команда ғана финалға жолдама алды.

Astana Hub резиденті болып табылатын QazTWIN стартабы өндірістік нысандарға арналған цифрлық егіздер платформасын ұсынды. Бұл шешім SCADA, IoT, ERP және басқа да жүйелерден келіп түсетін дерек ағындарын 3D-модельдермен біріктіріп, өндірістік кәсіпорындарға процестерді нақты уақыт режимінде кешенді түрде бақылауға мүмкіндік береді. Платформа қазірдің өзінде Қазақстандағы энергетика және инфрақұрылым нысандарында енгізіліп жатыр.

«QazTWIN – бұл жай ғана идея емес, нақты мәселелерді шешуге арналған дайын өнім. Бізге дауыс берген барша жанға алғыс айтамыз – бұл біздің миссиямыздың қолдау тапқанын білдіреді. Көрермендер дауысында жеңіске жету – тек мойындау ғана емес, сонымен қатар алға жылжуымызға серпін беретін зор мотивация. Бұл – біз дұрыс бағытта келе жатқанымыздың және технологиямыздың саланы өзгертуге қабілетті екенінің дәлелі», – деді KazScanService компаниясының бас директоры Темірлан Бұланбай.

Көрермендер жүлдесі ретінде команда Constructor Start акселераторының бас директоры және Constructor University Кәсіпкерлік және инновациялар орталығының директоры Дмитрий Куринмен 10 сағаттық жеке менторлық сессиялар өткізу мүмкіндігіне ие болды. Бұл мүмкіндікті команда халықаралық нарықтарға – атап айтқанда, Үндістан, Қытай, MENA елдері мен Оңтүстік Африкаға шығуға, сондай-ақ келесі инвестициялық раундқа дайындыққа пайдаланбақ.

Demo Day-дағы табыстан кейін команда белсенді жұмысын жалғастырып жатыр: үш пилоттық жоба аяқталып, бір коммерциялық келісім іске асырылуда, сондай-ақ платформаның масштабталатын SaaS-нұсқасы әзірленуде. Стартап келесі халықаралық қадам ретінде Испаниядағы B Acceleration Week іс-шарасына қатысып, өз шешімдерін Еуропа мен Латын Америкасының инвесторлары мен корпорацияларына таныстыруды жоспарлап отыр.