Елімізде мүлік иелерінің бірлестігін смартфондағы батырманы басу арқылы тіркеуге болады. Бұл үшін қосымшаның көмегімен қажетті өтінішті онлайн түрде тапсыру керек. Тұрғын үй иелері мен жалға алушылар цифрлық ID жүйесі мен электрондық цифрлық қолтаңба арқылы анықталады. Нәтижесінде МИБ тіркеліп, оның төрағасын сайлау жөніндегі қорытынды мәлімет бірнеше күнде смартфонға жіберіледі.

«Осы іс-шара МИБ-ті құру кезеңдерін цифрландыруға арналған қосымша жайлы ақпаратты халыққа жеткізуге бағытталған. Дауыс беруден бөлек бұл платформада тұрғын үйдің  басқа да мәселелерін шешуге септесетін қызметтер де бар. Индустрия және инфрақұрылымдық даму министрлігі аталған бастаманы қолдайды. Өйткені мұндай ақпараттық жүйелер мемлекеттік деректер базасымен интеграцияланып, тиісті рәсімдердің ашықтығын қамтамасыз етеді», – деді Д.Щеглова.

Өз кезегінде «Управ.дом» жобасын әзірлеушілердің бірі Олжас Ақбаев жаңа қызмет түрінің ақпараттық қауіпсіздік талаптарына толық сай келетінін және одан өткенін куәландыратын аттестаттың бар екенін атап өтті.

«Аталған қызметті дайындауда қазақстандықтар үшін дауыс беру мен МИБ-ті тіркеу процесін барынша жеңілдетуді көздедік. Адамдар мұндай мәселелерді тез және ашық түрде шешу тиіс. Сондай-ақ дербес деректер туралы заңнамаға сәйкес жеке мәліметтердің құпиялығын сақтап, бақылау сервисі жолға қойылған», – деді О.Ақбаев.

Айта кетейік, қазір қосымшаға 4 мыңға жуық тұрғын үй қосылған. Жобаның авторлары 2023 жылдың соңына дейін республика бойынша 20 мың үйді қамтуды жоспарлап отыр.