Қатысуға өтініштер мына сілтеме арқылы 24 маусымға дейін қабылданады.

Әйелдерге цифрлық технологиялар қолжетімділігін арттыру олардың экономикалық мүмкіндіктерін кеңейтіп, еңбек нарығындағы жағдайын жақсарта түседі. 

Бүгінгі таңда бүкіл әлем бойынша технологиялар мен IT-әлемінде әйелдер үлесі едәуір аз. Бұған қажетті техникалық дағдылардың болмауы және қолданыстағы әлеуметтік нормалар мен гендерлік үміт әсер етіп отыр. ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия «Әйелдерге арналған цифрлық экономика» бастамасын қарқынды ілгерілетіп келеді. Себебі, комиссияның цифрлық дағдыларды дамытуды көздейтін  бағдарламалары мен бастамалары арқылы әйелдер еңбек нарығында бәсекеге қабілеттілігін жақсартып, лайықты табыс тауып, кәсіби түрде шыңдала алады.

 «Қазақстан – цифрландыру тұрғысынан өте дамыған ел. Egov жүйесі әлемнің 198 мемлекеті арасында 28-ші, ТМД және Орталық Азия елдері арасында 1-орынға тұрақтап, көш бастап тұр.  Елімізде IT-білім беру жүйесі қарқынды дамып келеді, сол себепті қыздар мен әйелдерде технологиялық индустрияда даму үшін барлық жағдай жасалған», - деді Азиза Шужеева, ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссия мүшесі. 

Ұлттық комиссия әйелдердің экономикалық мүмкіндіктерін кеңейту және нәтижелі жұмыспен қамтуға тарту, олардың табысын арттыруға жағдай жасау мақсатында іс-шаралар  жоспарын әзірледі. Сондай-ақ Astana Hub-пен бірлесіп 2023 жылы жұмыссыз және декреттік демалыстағы әйелдердің цифрлық құзыретін дамыту үшін IT-Aiel жобасының бірінші легі іске қосылды. 

«Былтыр IT-Aiel бағдарламасы аясында Қазақстанның түкпір-түкпіріндегі 2634 әйел IT көмегімен өз өмірін өзгертуге ұмтылып, қатысуға өтінім берді. Олардың қатарында 900-ден астам жұмыссыз, 500 студент, 700 өзін-өзі жұмыспен қамтыған қыз-келіншек және 400-ден астам декреттегі ана бар. Бірінші лек түлектері веб-сайттар мен қосымшалар сияқты өз IT-өнімдерін жасады. Осылайша, олар қаржылық тәуелсіздік пен кәсіби шыңдалуға маңызды қадам жасады. Биыл бағдарламаның екінші легі аясында әйелдер табысты мансап құрып,  қоғамның дамуына үлес қосуға септігін тигізетін жаңа мүмкіндіктерге қол жеткізе алады», - деді Дания Ахметова, Astana Hub басқарушы директоры.

Жобаның екінші легі аясында ұсынылатын курс мазмұны: веб-сайттар, мобильді қосымшалар, чатботтар мен басқа да код жазуды қажет етпейтін  сандық өнімдер құруға арналған No Code School; қашықтан жұмыс істеуге, өз бағытын таңдауға, қызметтерді сатуға және клиенттерді тартуға арналған Freelance School; мақсатты жарнаманы әзірлеуге, әлеуметтік желіде парақшалар жүргізуге, интернет-дүкен ашуға, халықаралық онлайн-алаңдарда тауарлар сатуға, онлайн-төлемдерді қосу мен киберқауіпсіздік негіздеріне үйретуге арналған Mastercard қолдауы бар E-commerce-тен тұрады.

«2023 жылы декретте отырған кезімде әйелдерге IT-мамандықтары бойынша тегін оқудан өтуге және жұмыс пен отбасы арасындағы тепе-теңдікті сақтай отырып, қашықтан жұмыс істеуге мүмкіндік беретін IT-Aiel жобасына қатыстым. Оқытудың нәтижесінде балалар мен жасөспірімдер арасындағы цифрлық гигиена және кибербуллингтің алдын алу туралы бот-көмекші CyberBalа жобасын құрдым, оны no code құралдарының көмегімен жасадым», - деді Әлия Оразымбетова, IT-Aiel бағдарламасының финалисі, CyberBala жобасының авторы.

Электронды коммерция әйелдерге көп мүмкіндік ұсынады. Euromonitor International және KPMG компаниялары жүргізген зерттеулерге сәйкес, 2023 жылы e-commerce нарығының көлемі 1,3 трлн теңгені құраған. Бірақ e-commerce-тің қарыштап дамуына қарамастан, қолөнерші әйелдер нарығы мен шағын орта бизнес өкілдері ірі электронды сауда алаңдарына шығу барысында қиындықтарға тап болып жатады.

«Заманауи кәсіпкерлік экожүйесін құру үшін шағын және орта бизнес өкілдеріне қолдау мен ынталандыру шаралары қажет. E-commerce бойынша оқыту шағын және орта бизнес өкілдеріне digital-кеңістікте өз үлесін арттыруға көмек көрсету ниетімен құрылды. Осы бастама арқылы еліміздің цифрлық экономикасын нығайтуға септігіміз тиетініне шын жүректен сенеміз», - деді Аружан Меде, IMPRO бас директоры.

IT-Aiel 2.0 жобасын Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссия, Astana Hub халықаралық технопаркі және «TechnoWomen» коммерциялық емес ұйымы жүзеге асырып келеді. Қатысуға ниет білдірген барша аруды белсенді болуға және тегін білім алуға шақырамыз. Бұл бастама қатысушыларға IT-саласында өз бағытын табуға мүмкіндік береді.

«IT-Aiel 2.0» жобасының іске асырылуына қатысты ақпарат сайт пен @astanahub/@technowomenkz аккаунттарында орналастырылған.