2025 жылдың 24 мамырында Астанада Technovation Girls Kazakhstan өңірлік финалы өтті. Бұл байқауда 8 бен 18 жас аралығындағы 238 қыз өздерінің технологиялық шешімдерін ұсынды — олар адамзаттың игілігі үшін жасалған ерекше идеяларымен көзге түсті. Қазылар алқасының құрамында Astana Hub өкілдері – басқарушы директор Валерия Тё мен технологиялық орталықтар офисінің директоры Анарбек Өтегұлов болды.

Нәтижесінде ең үздік 6 команда халықаралық жартылай финалға жолдама алып, 69 елдің қатысушылары арасында Қазақстанның атынан өнер көрсетеді. Astana Hub атынан арнайы сыйлыққа Bolis App командасы ие болды. Олар жасөспірімдердің психикалық саулығы тақырыбын терең түсініп, технологиялық тұрғыдан шешім ұсынғаны үшін марапатталды. Қыздар Astana Hub ұйымдастырған үш айлық стартап-кәсіпкерлік бағдарламасына қатысу мүмкіндігін иеленді.

Bolis App жобасын Жанайым Корпебаева, Назерке Кажмуратова, Айзере Каламбай, Азель Кабдулла мен Аруана Касабекова есімді жасөспірімдер тобы жасады. Олар жасөспірімдер өз эмоцияларын ашық айтып, түсіністікпен қабылданатын қауіпсіз орта құруды мақсат етті. Команданың менторы — Аяулым Аяғанова.