Бағдарламада географиялық шектеу жоқ, демек әлемнің түкпір-түкпіріндегі әзірлеушілер, инженерлер, деректерді талдаушылар, өнім менеджерлері мен өзге де IT-мамандары қатыса алады. Бағдарлама офлайн форматта Қазақстанның бас қаласы – Астанада өтіп, өзге қалалар мен шет мемлекет қатысушылары тұрғын үймен қамтылады. 4 айға созылатын бағдарламада оқыту, стартап-жобаларды әзірлеу бойынша сала сарапшыларының жеке кеңестері қамтылады.  

«Жаңа заманда AI бизнестен бастап медицина мен білімге дейінгі өміріміздің әртүрлі салаларымен етене қайнасып кетті. AI'preneurs-тің құндылығы – идея пайда болған сәттен бастап нарықта сәтті жүзеге асқанға дейін стартаптардың шыңдалуына толық жағдай жасау. Бағдарлама аясында білікті тәлімгерлер мен үйлестірушілер жобалардың дамуына тікелей қолдау көрсетіп, ілгерілеуін бақылайды. Қатысушылар маманданған сарапшыларға жүгініп, өз өніміне қатысты жеке кеңестер алады. Сонымен қатар командаларға қажетті датасеттер мен GPU ұсынып, олардың техникалық жабдықталуына жағдай жасаймыз», - деді Ербол Ахметов, Astana Hub бизнес бағдарламалар офисінің директоры.

Акселератор 3 негізгі кезеңнен тұрады: команда құру, инвестициялық комитетпен байланыс және өнімді әзірлеу барысы. 1-кезең аясында қатысушылар серіктестер тауып, іріктелген кандидаттар арасынан командалар құрады. 2-кезеңде жасақталған командалар стартап идеясын ойластырып, өнімнің прототипін жасайды және оны инвестициялық комитетке ұсынады. Олардың жобасы келесі кезеңге сәтті өтсе, қаржы бөлінеді. Ал одақтасын таппаған қатысушылар және инвестициялық комитет мақұлдауын алмаған командалар бағдарламамен қоштасады (немесе басқа командаға қосылады). Соңғы кезеңде стартаптар өнім әзірлеуге кіріседі.

Қарым-қатынасты нығайту мақсатында өзекті тақырыптар аясында жетекші сарапшылардың қатысуымен тимбилдингтер мен воркшоптар қарастырылған. Сондай-ақ стартаптарға сараптамалық кеңес алу үшін Advisory Board тұрақты қолжетімді болады, бұдан бөлек трекинг пен түрлі дәрістер ұйымдастырылады. AI'preneurs туралы қосымша ақпарат алып, өтініш беру үшін сілтемеге өтіңіз.