Өтінімдер 30 маусымға дейін мына сілтеме арқылы қабылданады.

AlchemistX & Silicon Valley Residency Program бағдарламасына қатысушылар алғашқы мәмілелер жасасу, инвестиция тарту, тұтынушылардың қажеттіліктерін зерттеу бойынша қолдау алып, тәжірибелі спикерлер және тәлімгерлермен өзара пікір алмасады. Бағдарлама кезінде АҚШ-тағы тұрғын үймен қамтамасыз етіліп, Silkroad Innovation Hub қауымдастығына қол жеткізеді.

«AlchemistX & Silicon Valley Residency Program бағдарламасы B2B стартаптар үшін 2 негізгі бағытты ұсынады. Сонымен қатар барлығына ортақ Foundation бар. Мұнда бизнес негіздері, болашақ технологиялары мен даму стратегияларын қамтитын онлайн алдын ала акселерация қарастырылған. Ал 1-Track  Кремний алқабында тұру мүмкіндігі мен тәлімгерлік сессияларды ұсынып, инвесторлар және жаңа нарықпен жұмыс істеуге баулиды. 2-Track - AlchemistX акселераторы аясында қатысушылар американдық нарыққа арналған Go-To-Market стратегиясын әзірлеп, B2B стартаптар үшін сату иірімін жасайды», - деді Ербол Ахметов, Astana Hub Бизнес-бағдарламалар офисінің директоры.

Бағдарламаға Қазақстан, Қырғызстан, Өзбекстан, Тәжікстан, Түрікменстан, Түркия, Моңғолия, Әзірбайжан мен Грузияның B2B стартаптары қатыса алады. Олар Қазақстанда немесе АХҚО-да заңды түрде тіркеліп, өз клиенттік базасын растауы қажет. Бұдан бөлек қатысушылар ағылшын тілін еркін меңгеруі тиіс.

AlchemistX & Silicon Valley Residency бағдарламасы және өтініш беруге қатысты мәліметтерді astanahub.com платформасынан оқуға болады.