Маңызды кездесулердің бірі Сербияның ақпарат және телекоммуникациялар министрі Деян Ристичпен өтті. Тараптар GovTech саласындағы бірлескен жобаларды дамыту, жасанды интеллект, телекоммуникациялар мен инновациялар саласындағы ынтымақтастық мәселелерін талқылады. Astana Hub-пен бірлесе жұмыс істеу, Астана халықаралық қаржы орталығының (АХҚО) артықшылықтарын таныстыру және Сербияның IT қызметтер экспортындағы тәжірибесін зерттеу бойынша келісімге қол жеткізілді.

Министр Крагуевац қаласындағы Мемлекеттік деректерді өңдеу орталығына (МДӨО) барды, ол тиімді цифрлық инфрақұрылымның жарқын үлгісіне жатады. МДӨО Еуропалық Tier IV стандарты бойынша сертификатталған, бұл оның сенімділігі мен қауіпсіздігін көрсетеді. Орталық мемлекеттік басқару үшін ғана емес, Oracle, IBM және Huawei сияқты ірі IT-компаниялар үшін де қызметтер ұсынады, бұл Сербияның технологиялық беделін нығайтады.

Сондай-ақ, Сербияның CERN ғаламдық есептеу желісіне интеграциялау тәжірибесі талқыланды. Сербия Еуропада жетінші және әлемде оныншы болып бұл желіге қосылды. МДӨО өңдеген деректер халықаралық ғылыми зерттеулер үшін қолданылады, бұл Қазақстан үшін де қызықты бағыт болуы мүмкін.

Сербия тарапы Қазақстанның цифрлық жетістіктерін, атап айтқанда, жасанды интеллектті дамыту бойынша делегация ұсынған ауқымды жоспарларды жоғары бағалады.

IT-саласының өсуін (2024 жылы IT-қызметтер экспорты шамамен 4 миллиард еуроны құраған) көрсеткен Сербия Қазақстан үшін перспективалы серіктеске айналды. Цифрландыру, ғылым және инновациялар саласындағы ынтымақтастық екі ел арасындағы байланыстарды нығайтып, екі жаққа да жаңа технологиялық даму мүмкіндіктерін ашады.

Дереккөз: ҚР ЦДИАӨМ