Бұл бастама қазақстандық Growth Vision Pro компаниясы тарапынан көтеріліп, ҚР Цифрлық даму, инновациялар және аэроғарыш өнеркәсібі министрлігінің, сондай-ақ өңірдегі жетекші технопарктер – Astana Hub (Қазақстан) пен IT Park Uzbekistan-ның қолдауымен жүзеге асырылды.

Khan Tengri Innovation Hub – жаңа буындағы технологиялық дипломатия алаңы ретінде құрылып отыр. Ол Орталық Еуразияның стартаптары, инновациялық компанияларын және R&D орталықтарын Қытай нарығымен, сондай-ақ оның жаһандық мүмкіндіктерімен байланыстыруды көздейді. Бұл бастама өңірлер арасындағы орнықты технологиялық әріптестікке деген өсіп келе жатқан қажеттілікті көрсетеді.

«Khan-Tengri Innovation Hub өңірдегі стартаптар мен кәсіпкерлер үшін қытайлық инвесторлармен байланыстыратын көпірге айналып, инкубациялық және акселерациялық бағдарламаларға жол ашады. Біз бұл хаб еліміздің технологиялық компаниялары өнімдерін Қытай нарығына ілгерілетуде маңызды рөл атқарады деп сенеміз», – деді Цифрлық даму, инновациялар және аэроғарыш өнеркәсібі министрі Жаслан Мадиев.

"Бүгінде Қытай жасанды интеллект технологияларын дамыту бойынша алдыңғы қатарда. Ауқымды ішкі нарығы мен жалпы ішкі өнімі бойынша әлемдегі ең ірі мемлекеттердің бірі ретінде Қытай жаһандық цифрлық трансформациялардың эпицентріне айналды. Khan Tengri Hub Орталық Азиядағы технологиялық компаниялар үшін Қытай мен Оңтүстік-Шығыс Азияға шығатын стратегиялық көпірге айналуды, сондай-ақ қытайлық инновациялық бизнес үшін біздің өңірге сенімді бағыттаушы болуды мақсат етеді. Өңіраралық ынтымақтастықты дамыту барысында біз қуатты инновациялық орта қалыптастыру үшін негізгі серіктестермен күш біріктірудеміз. Мәселен, IT Park Uzbekistan ұйымымен бірлесіп, Орталық Азиядағы стартаптардың жаһандық нарықтарға шығуына жол ашатын экожүйе құрып жатырмыз",— деп атап өтті Astana Hub бас директоры Мағжан Мәдиев.

«Хан Тәңірі» инновациялық хабы – Қазақстан мен Орталық Азия компанияларының Қытайда өз бизнесін сенімді түрде бастауына және дамытуына арналған алаң. Бұл – әлемдегі ең күрделі әрі бәсекеге қабылетті нарыққа шығу үшін негізгі кедергілерді жоюға бағытталған бастама. Хабтың басты мақсаты – еуразиялық стартаптар мен ІТ-компаниялар үшін жаһандық мүмкіндіктерге жол ашу.

Khan Tengri Innovation Hub-та қатысушыларға Қытайдың алдыңғы қатарлы технологиялық парктерінің бірінде жұмыс істеу және өмір сүру үшін барлық жағдай жасалған. Заманауи кеңселер, коворкингтер, сервис апартаменттері – бұлардың барлығы тұрмыстық және ұйымдастыру мәселелеріне қарамастан, өнімді толық дамытуға мүмкіндік береді.

Ең бастысы – барлық кезеңде қолдау көрсетіледі: заңдық және салықтық кеңес беруден бастап, қытайлық инвесторлармен, өндірістік серіктестермен және акселераторлармен байланыс орнатуға дейін. Мұндай тәсілді жаңа бизнес-ортада «жұмсақ қону» – soft-landing деп атайды.

"Khan Tengri Innovation Hub – Орталық Азия мен Қытай арасындағы технологиялық серіктестіктің жаңа көкжиектерін ашатын алаң. Өзбекстан мен Қазақстан үшін бұл әлемдегі ең ірі нарықтағы жай ғана өкілдік емес, бұл – білім трансфері, бірлескен әзірлемелер мен стартаптарды халықаралық деңгейге шығару платформасы. Қытайдың жетекші инновациялық орталықтарымен стратегиялық әріптестік аясында стартаптарымыз жаһандық инфрақұрылымға қол жеткізіп, жаңа даму мүмкіндіктерін пайдалана алады", – деп бөлісті IT Park Uzbekistan бас директоры Абдулахад Кучкаров.

Инфрақұрылымнан бөлек, хаб білім беру және акселерациялық бағдарламаларға қол жеткізуді ұсынады, бұл компанияларға Қытайда тез бейімделіп, масштабталуға мүмкіндік береді. Қытайлық XNode акселераторымен бірлесіп әртүрлі даму деңгейіндегі компанияларға арналған бағдарламалар әзірленді. Олардың қатарында нарықты зерттеп, шығу стратегиясын құруға бағытталған қысқа мерзімді China Market Entry Bootcamp, сондай-ақ компанияны іске қосып, Қытайдағы қатысуды кеңейтуге арналған China Launchpad та бар. Қатысушылар менторлық қолдау алып, воркшоптарға қатысады, іскерлік кездесулер өткізіп, Қытай технологиялық экожүйесін өз ішінде зерттеп бастайды.

Khan Tengri Innovation Hub – әлемдегі ең ірі тұтыну нарығына жол ашады, ол инвестиция тартуға, серіктестер табуға және технологиялық шешімдерді экспорттауға көмектеседі. Бұл – көптеген компаниялар үшін жаһандық ойыншыға айналуға берілген мүмкіндік.

Толығырақ ақпарат ҚР Цифрлық даму, инновациялар және аэроғарыш өнеркәсібі министрлігі сайтында.