«Pizza Pitch - бұл стартаптар таныстырылатын алаң ғана емес, идеялар мен инновациялар, амбиция мен мүмкіндіктер бір жерде тоғысатын арена. Бұл алаңда стартаптар бар болғаны үш минут ішінде өз идеясын ортаға салып, әлеуетін көрсетіп, табысқа жол ашады», - деді Astana Hub ивенттер кеңсесінің директоры Ольга Измаилова.

Пайдаланушыларға топтық немесе жеке жаттығуды брондауға мүмкіндік беретін фитнес қосымшасы - Hustle стартапы Pizza Pitch жеңімпазы болды.

 «Көптеген жаттықтырушы мен зейнеткерлікке шыққан кәсіби спортшы фитнес-клубтар мен тренажер залдарының тапшылығына байланысты жұмыс таба алмай қиналады. Біздің қосымшамыз тренерлер мен кәсіби фитнес сабақтарын іздейтіндер арасында көпір болып, клиент табуға көмектеседі», - деп Hustle стартапының негізін қалаушы және бас директоры Руслан Тілеубаев жобаны таныстырды.

 Pizza Pitch финалдық кезеңіне қатысқан жобалар:

Tez-tez – қоғамдық тамақтану орындарында, қонақ үйлерде және түрлі іс-шаралар кезінде планшеттің көмегімен тұтынушылардың өзіне-өзі қызмет көрсету дүңгіршектері.

 FinUp.kz – бизнесті тәулік бойы жүргізуге арналған виртуалды есепші.

Odep Lab – ғалымдар мен Нобель сыйлығының лауреаттарын тәрбиелеуге бағытталған зерттеулер мен жобалар мектебі.

Tasyma - Tinder технологиясын қолдану арқылы Machine Learning негізінде жұмыс істейтін цифрлық жүк тасымалы қызметі.

Materia.kz – әртүрлі дереккөзден алынған ақпаратты стратегиялық ұғымға айналдыратын деректерді талдау платформасы.

QULPYN.AI — жасанды интеллект арқылы аудио, бейне және мәтінді ТМД елдері тіліне аудару жобасы.

GoFi – жасанды интеллект технологиясымен жұмыс істейтін сыйлықтар мен оған қажетті заттарды табуға арналған қызмет.

2023 жылы Astana Hub 4 рет Pizza Pitch ұйымдастырды, олардың бірі Go Viral фестивалі аясында өтті. Биыл Pizza Pitch алаңына 1300-ден астам адам жиналған. Pizza Pitch бұған дейін  өткен финалдары туралы ақпаратты astanahub.com платформасынан табуға болады.