Сапар барысында депутаттар қазақстандық стартаптардың жобаларымен танысты. Олардың қатарында CodiPlay – бағдарламалау дағдыларын ойын арқылы үйрететін платформа; SHAI – интеллектуалды көмекшілер мен AI-агенттер жасауға арналған шешім; CYBERNET AI – 12 тілде қызмет көрсететін корпоративтік секторға арналған дауыстық жасанды интеллект қызметі; Dereknet – мұнай-газ саласындағы процестерді модельдеу және есептеу жүйесі; NeuronOil – кен орындарын тиімді игеру симуляторы; Alaqan – алақан тамырының биометриясына негізделген байланыссыз төлем жүйесі; сондай-ақ автоматтандыру, аналитика және радионавигация бағыттары бойынша кешенді IT шешімдер ұсынатын AG TECH жобалары бар.

Депутаттар ерекше назар аударған бастамалардың бірі – Astana Hub-тың peer-to-peer форматындағы алғашқы жасанды интеллект мектебі Tomorrow School болды. Бұл мектеп бағдарламашы әрі педагог Николя Садирак әзірлеген 01 Edu платформасы негізінде жұмыс істейді.

Бұдан бөлек сенаторларға Astana Hub қызметінің негізгі бағыттары мен «Ұлттық инновациялық жүйе» бірыңғай терезесі Қазақстанның цифрлық ғылыми порталының мүмкіндіктері таныстырылды.

Бұл сапар Astana Hub-тың ұлттық инновациялық экожүйені дамытудағы маңызды рөлін және технологиялық бастамаларға парламент деңгейінде ерекше қызығушылық бар екенін айшықтайды.