24KZ телеарнасының тікелей эфирінде Astana Hub Қатысушыларды қолдау кеңсесінің директоры Талғат Маратов Digital Nomad Residency бағдарламасы туралы айтып, оған қандай мамандар үміткер бола алатынын түсіндірді.

Оның айтуынша, бағдарлама шетелдік IT-мамандары мен цифрлық көшпенділерге Қазақстанда заңды түрде тұрып, қашықтан жұмыс істеуге мүмкіндік береді. Бұл ретте олар шетелдік компаниялармен еңбек қатынастарын сақтап, жергілікті IT компанияларда жұмысқа орналасу мүмкіндігін де пайдалана алады.

«Бұл — Қазақстанның IT саласына халықаралық таланттарды тарту және қашықтан жұмыс істеуге қолайлы жағдай жасау стратегиясының бір бөлігі. Визаға ақпараттық технологиялар сәулетшісі, бағдарламалық жасақтама әзірлеуші, бағдарламалық өнімдерді қолдау жөніндегі маман, жасанды интеллект саласының маманы және елімізге қажетті басқа да сұранысқа ие мамандық иелері үміткер бола алады», — деді ол.

Бағдарлама туралы толық ақпаратты 24KZ YouTube арнасынан біле аласыздар.