Astana Hub бас директоры Мағжан Мәдиев Марокко, Индонезия, Қырғызстан, Ресей (Татарстан, Башқұртстан), Бразилия, Сербия, Түркменстан, Тәжікстан, Беларусь, Өзбекстан, ҚХР-дан келген делегаттарды күтіп алып, оларға технопарк жұмысын таныстырды. Ол Astana Hub-тың миссиясы – республиканың ақпараттық-коммуникациялық технологиялар саласын дамыту екенін айтты.

«Біздің мақсат – 2025 жылдан бастап экспорттың жылдық табысын 500 миллион долларға жеткізу. Яғни, цифрлық инновациялық технологиялардың көмегімен ел экономикасын әртараптандыру. Біз IT-кәсіпкерлерге арнап көптеген қолдау құралы бар үлкен экожүйе қалыптастырып жатырмыз. Бүгінде 1200 шақты IT-компания технопарктың қатысушысы ретінде тіркелген. Біз экстерриториялық қағидат бойынша жұмыс істейміз, яғни 100 компания осы жерде, қалған 1100-і елде орналасқан», - деді Astana Hub CEO-сы Мағжан Мәдиев.

Сонымен қатар, қонақтарға Alem School (бағдарламалау мектебі), Blockchain Center және бірқатар стартап-жоба таныстырылды: 

Citix  – Қазақстан және одан тысқары жерлерде ақылды қалаларды құрап,  креатив және технологиялық сыртқы жарнама үшін инновациялық шешімдер ұсынатын  Smart City және  AdTech-компаниясы; 

Alaqan – алақан тамырларының суреті көмегімен тұлғаны биометриялық сәйкестендіру саласындағы жаңа шешім; 

Beine AI – бейнекамера мен ашық дереккөздерден бет-әлпетті іздеу және тану технологиясын әзірлеуші; 

Parqour – көлік тұрағын басқарудың зияткерлік жүйесі. 

«Бразилияда  Astana Hub технопаркіне ұқсайтын ештеңе жоқ. Сіздерде Бразилияға қарағанда IT-саласы әлдеқайда жақсы дамыған. Еліме осы технопарк туралы айтып барамын. Маған бірнеше стартап ұнады. Мысалы, Alaqan жобасы. Оны біздің елде қалай қолдансақ болатыны туралы ойланамын», - деп әсерін бөлісті Бразилиа қаласы мэрінің көмекшісі Самия Андраде. 

Мағжан Мәдиев қонақтарға Орталық Азиядағы ең ірі  IT-шара - Digital Bridge  форумы туралы айтып, оларды биыл қазан айында өтетін дәстүрлі шараға қатысуға шақырды.