Томас Прамотедхам Presight компаниясын G42 тобының еншілес ұйымы әрі Big Data талдау мен жасанды интеллект бағытындағы жаһандық көшбасшы деп, Қазақстанның цифрлық дамуын қолдауға әзір екенін ерекше атап өтті. Негізгі бастамалардың бірі – alem.ai алаңында Ахуал орталығын құру. Аталған ұйым қала инфрақұрылымын басқаруда зияткерлік хаб қызметін атқарады. Жаңа орталық Smart City жобасы аясында қалалық қызметтердің жұмысына жедел мониторинг, деректерді талдау және жасанды интеллектті қолдана отырып, басқару мүмкіндіктерін үйлестіретін негізгі платформа болмақ.

Ахуал орталығында жасанды интеллекттің озық алгоритмдері қолданылады, оның ішінде көлік қозғалысын болжау, оқыс оқиғаларды автоматты түрде анықтау, бет-бейне және көлік нөмірлерін тану мен аномалияларды анықтау технологиялары бар. Осы шешімдерді біріктіру коммуналдық қызметтердің тиімділігін біршама арттырып, оқыс оқиғаларға жауап беру уақытын қысқартып, қала инфрақұрылымын оңтайландыруға септігін тигізеді.

Орталық қала бойынша 22 мың бейне және IoT сенсорлық жүйелерін біріктіру арқылы қамту аймағын 67%-ға арттырады. Жасанды интеллект алгоритмдері жаяу жүргіншілер мен көліктер қозғалысын автоматты түрде талдап, құқықбұзушылықтарды анықтап, нақты уақыттағы деректерді тиісті қалалық қызметтерге жолдайды. Бұдан бөлек, орталық арнайы физикалық қауіпсіздік саласындағы деректерді басқару платформасымен кіріктіріліп, қала бойынша қауіпсіздік жүйесінің бірыңғай интерфейсін, төтенше жағдайларға жедел ден қоюды үйлестіруді және қауіп-қатерді болжау мүмкіндігін қамтамасыз етеді.

«Біз Қазақстанның озық цифрлық технологияларды игерудегі көшбасшылығы мен жасанды интеллектті дамытуға деген ұмтылысын жоғары бағалаймыз, әсіресе, alem.ai жобасының құрылуын ерекше атап өтеміз. Бұл бағытты толық қолдаймыз. Presight компаниясы Қазақстанның цифрлық экономикада көшбасшы атануына қажетті технологияларды, сараптаманы және ресурстарды ұсынуға дайын», – деді Томас Прамотедхам.

alem.ai бастамасы аясында Presight пен Astana Hub жасанды интеллект пен Big Data талдау бағыттарында ынтымақтастықты жалғастырады, сондай-ақ Қазақстандағы салалық мамандарды даярлау мен дамытуға үлес қосады. Компания үлкен деректерді инновациялық тұрғыда қолдануға бағытталған стартаптарды қолдап, жасанды интеллект шешімдерін мемлекеттік және жеке секторларда енгізуді көздеп отыр.