Менің атым Аяулым Арғынғазина, мен Astana Hub халықаралық технопаркінің Семей қаласы Абай облысындағы өңірлік менеджерімін. Мен өз өлкемде цифрлық саланы дамытуға үлес қосып жатқанымды мақтан тұтамын. Astana Hub тәжірибесін кеңейту арқылы Abay IT Valley хабымыз дарынды адамдарды тарту орталығына айналды.

2016 жылдан бастап мен экономикалық, экологиялық және әлеуметтік бастамаларды жүзеге асырып, стартап жобаларына қатыстым. 2020 жылдан бастап 2022 жылға дейін мен маркетплейстермен жұмыс істеп, алғашқы қомақты қаржыға қол жеткіздім. 2022 жылдан бастап Абай ауданында IT-индустрия мен стартап экожүйесін дамытып келемін.

Біз жыл сайын 100-ден астам іс-шара ұйымдастырып, 20-дан астам стартап жасаймыз және Tech Orda бағдарламасы арқылы 70-тен астам студент оқытылады. Болашағы зор жастарды қолдау мақсатында 20 миллион теңгеден астам грант тарттық.

2022 жылы маған Astana Hub-тың Startup Orda жобасын дамытуды ұсынды. Жоба сәтті болды: үш айдың нәтижесінде  Demo Day-те 18 жоба таныстырылды. Бұл мені IT саласында одан әрі жұмыс істеуге шабыттандырды. Мен тәлімгер болып, бизнес-жоспарлауға, маркетингке және жобаларды басқаруға көмектесемін. Біз білім беру бағдарламалары мен тренингтер ұйымдастырамыз, семинарлар өткіземіз және Astana Hub сайтынан онлайн курстарға қолжеткізуге  жағдай жасаймыз.

Біз әзірлеушілер, кәсіпкерлер және инвесторлар қауымдастығын құрып, хакатондар, фестивальдар мен байқаулар ұйымдастырамыз. Сондай-ақ ІТ-стартаптар үшін коворкинг пен кеңсе кеңістігін қамтамасыз етеміз, қаржыландыруды табуға және инвесторлармен байланысуға көмектесеміз. Біз білім беру бағдарламаларын, тағылымдамалар мен ғылыми жобаларды әзірлеу үшін жергілікті мектептермен, колледждермен және университеттермен серіктестік орнаттық. Бұл студенттерге практикалық дағдыларды алуға және IT саласындағы мансапқа дайындалуға көмектесті. Сондай-ақ біз Huawei компаниясымен меморандумға қол қойып, Huawei зертханасын ашу жоспарымен үш маманды оқуға жібердік.

Өңіріміздегі ІТ-экожүйенің болашағы жарқын деп ойлаймын. Жергілікті стартаптар, білікті IT мамандары мен инвестиция саны артатын түрі бар. Менің мақсатым – жаңа серіктестік орнату, іс-шаралар мен қолдау бағдарламаларын ұйымдастыру, халықаралық компаниялармен ынтымақтастықты нығайту және әлемдік нарықта жаңа мүмкіндіктер жасау.

IT-экожүйені дамытуға және қолдау көрсетуге қосқан үлесім жаңа инновациялар құруға септігін тигізіп, адамдардың өмірін жақсарта түссе екен деп армандаймын. Мен  жаңа сынақтардан қорықпайтын, өзін-өзі дамытуға ұмтылатын және қоршаған әлемге оң үлес қосатын адамдарды үлгі тұтамын. Әр күн бізге жаңа сабақ пен керемет мүмкіндіктер әкелетініне сенемін.