Еліміздегі IT-білімді дамытуға бағытталған бағдарлама аясында әрбір студентке 600 мың теңгеге дейін мемлекеттік қаржы бөлінеді. Tech Orda бағдарламасы жыл сайын 3 мыңнан астам IT-маманды даярлауды көздейді.

Естеріңізге сала кетсек, оқу ваучерлерін (гранттарды) бөлу механизмі процестің ашықтығы мен тиімділігін көрсететін үш кезеңнен тұрады. Бірінші кезеңде іріктелген IT-мектептер бағдарламаға қатысу үшін аккредитациядан өтеді, оны IT-нарық өкілдерінен тұратын тәуелсіз комиссия жүзеге асырады. Екінші кезеңде түлектердің жұмысқа орналасу көрсеткіштері мен өңірдегі мектептерге тиесілі арнайы коэффициентті ескере әзірленген алгоритм арқылы әр курсқа бөлінетін ваучер саны анықталады. Соңғы кезеңде мектептер студенттерді алған ваучерлеріне сәйкес  тегін оқытуға іріктейді. IT-дағдыларды меңгергісі келетіндер үшін байқау мамыр айында жарияланады.

Бағдарлама түлектерінің 87%-ы жұмысқа орналасып, олардың орташа жалақысы шамамен 500 мың теңгені құрады. Түлектер Kaspi.kz, Halyk Bank, KPMG, Ernst&Young, Теңізшевройл, ҚазМұнайГаз, Freedom Finance, Kcell, Air Astana, Kolesa Group сияқты ірі компанияларды қоса алғанда, 1079 ұйымнан жұмыс тапты.

Tech Orda бағдарламасы және өтінім беру процесі туралы толық ақпаратты мына сілтеме арқылы немесе 2222, +7 (7172) 73-50-89 технопарк нөмірлеріне хабарласу арқылы алуға болады.