2024 жылы 3 465 грант бөлінді, оның ішінде 2 465-і негізгі легке, ал 1 000-ы мамандандырылған топтар аясында педагогтерге ұсынылды. Атап айтқанда, 300 грант мектеп мұғалімдерінің және 700 грант ЖОО оқытушыларының біліктілігін арттыруға берілді. 

Мемлекет басшысы Қазақстан халқына Жолдауында кемінде 100 мың IT-маман даярлауды тапсыра отырып, жас, білімді әрі ынталы кадрларды қалыптастыру қажетін атап өтті. Тапсырмаға сәйкес ҚР ЦДИАӨМ бастамасымен Astana Hub халықаралық технопаркінің базасында 2021 жылы 20 мың IT-кадр даярлауды көздейтін Tech Orda бағдарламасы пилоттық режимде іске қосылған болатын. Осы бастама шеңберінде мемлекет қолдауымен әр студентке 600 мың теңге бөле отырып, жыл сайын 3 мыңнан астам IT-маман оқыту жоспарланған.   

Биыл 79 қазақстандық IT-мектеп және 1 IT-компания аккредиттеуден өтіп, веб-бағдарлама әзірлеу, 3D-дизайн мен 3D AR/VR қосымшалар, бағдарламалық қамтамасыз ету, киберқауіпсіздік пен IoT, жасанды интеллект, мобильді қосымшалар жасау, сондай-ақ Big Data мен GameDev сияқты өзекті бағыттар қамтылған 178 курс бойынша Tech Orda аясында мамандар даярлау мүмкіндігін алды.

Tech Orda бағдарламасының 2022 және 2023 жылдардағы нәтижелері білікті кадрларды даярлаудағы маңызын растайды. Бүгінде 91 мектеп 6251 студентті оқытты. Бағдарламаға ірі қалалардың тұрғындары ғана емес, өңір тұрғындары да белсенді қатысуда – IT-мектептердің шамамен 40%-ы және студенттердің 46%-ы еліміздің түрлі аймақтарынан. Бұл IT білім беруді ұлттық деңгейде дамытуға ықпал етеді. 

Статистикаға сәйкес, бағдарлама түлектерінің 88%-ы жұмысқа орналасып, олардың орташа жалақысы шамамен 500 мың теңгені құрады. Түлектер Kaspi.kz, Halyk Bank, KPMG, Ernst&Young, Теңізшевройл, ҚазМұнайГаз, Freedom Finance, Kcell, Air Astana, Kolesa Group пен басқа да жетекші ұйымдарда жұмыс істейді.

Tech Orda – IT-саласындағы кадрлық әлеуетті дамыту жөніндегі мемлекеттік стратегияны іске асырудың негізгі құралдарының бірі. Бағдарлама қазақстандықтардың кәсіби дамуына және педагогтердің біліктілігін арттыруға жаңа мүмкіндіктер ашады.