«Біз сіздерді мақтан тұтамыз және бағдарлама аяқталғаннан кейін де үнемі қолдау көрсетеміз, себебі сіздер енді Google for Startups-тың бір бөлшегіне айналдыңыздар. Жаңа деңгейге көтеріліп, табысты стартап ретінде таныла білдіңіздер, өте қуаныштымыз.  Біздің бағдарламаға қатысқандарыңыз үшін алғыс айтамыз», - деді Барыш Есугей, Google for Startups & Dev Ecosystem басшысы – MENA, Түркия, Орталық Азия.

Silkway Accelerator бағдарламасының үшінші легінің аяқталуына орай ұйымдастырылған Demo Day шарасында түлектер жергілікті және шетелдік инвесторларға презентация жасап, акселератор кезінде жеткен жетістіктері туралы әңгімеледі.

«Бағдарлама барысында біз процестерді цифрландырдық, негізгі бизнес-стратегияны анықтап, маркетинг мәселесіне жіті көңіл бөле бастадық, бірақ ең бастысы, біз $250 мың көлемінде инвестиция тарттық. Бұл бізге нарықтағы рөлімізді нығайтуға, саланың негізгі ойыншыларымен стратегиялық серіктестікті жүзеге асыруға мүмкіндік береді, мысалы, біз қазірдің өзінде Оңтүстік-Шығыс Азия нарығына шығуға дайынбыз. Біз нақты келісімшарттар, тиімді басқару және транзакцияның екі тарабы үшін қауіпсіздікті арттыру арқылы жалға алу процесін жеңілдетуге және жақсартуға тырысамыз», - деді Қанат Келдібеков, ApartX стартапының негізін қалаушы.

Silkway Accelerator үшінші легінің нәтижесі бойынша қатысушылар жалпы алғанда $575 мың жинады, MRR орташа есеппен 3 есеге өсіп, инвесторлармен $1,250 млн алдын ала келісім жасады.

«Silkway Accelerator шынымен индустрияны және біздің экожүйені дамытуға үлкен үлес қосып жатыр. Silkway Accelerator үш легінің нәтижесінде 37 стартап халықаралық нарыққа шығып, жақсы көрсеткішке қол жеткізді: бұл компаниялардың жалпы бағасы $400 млн құрайды, MRR – $2 млн, акселерация кезінде $7,5 млн инвестиция тартты. Біз Draper University бірге тағы бір акселерация бағдарламасын жүзеге асырып жатырмыз, оның аясында біздің 15 стартапымыз Кремний алқабында оқып жатыр, айтпақшы, солардың көбі Silkway Accelerator бағдарламасының өткен легінің түлектері», - деді Мағжан Мәдиев, Astana Hub бас директоры. Ол бірге жұмыс істеген серіктестер мен трекерлерге, сондай-ақ жан-жақты қолдау көрсеткені үшін ЦДИАӨМ-не алғыс айтты.

Еске салсақ, Қазақстан Орталық Азиядағы Google for Startups жаһандық компаниясымен бірлесе акселератор өткізіп жатқан бірінші және жалғыз мемлекет. Бүгінгі таңда Silkway Accelerator бағдарламасының жаңа төртінші легіне өтініш қабылданып жатыр. Өтініштер сілтеме арқылы 7 шілдеге дейін қабылданады, бағдарламаның басталуы тамыз айына жоспарланған. Оқу бұл жолы да Астанада оффлайн тәртіпте өтеді және үш айға созылады. Қатысушылар тегін баспанамен қамтамасыз етіліп, халықаралық қатысушыларға визалық қолдау көрсетіледі, сондай-ақ Google for Startups және Astana Hub-тан тренингтер мен менторлық қолдау көрсетіледі.

Бағдарламаның бірінші, екінші және үшінші легінің қатысушылары туралы толығырақ astanahub.com платформасынан білуге болады.

Google for Startups - 2011 жылы Google корпорациясы іске қосқан стартап бағдарламасы. Оның 125 елде 50-ден астам коворкинг пен акселераторы бар, технологиялық кәсіпкерлер үшін практикалық сабақтар ұсынады.